PORNOTAPAR: Pintar sobre fotos porno cotrañosas convertíndoas en escenas costumistas. Resultados altamente artísticos ao par que escarallantes. Esto ven sendo o que fai (con moito xeito) a artista euskalduna Paloma Blanco. PORNOTAPADOS é a publicación que recolle estas intervencións pitóricas e ten un formato clavado ás revistas porno de sempre. Edita Belleza Infinita. Ala, a regalarllo á sogra. E se non o atopas na túa parroquia conségueo aquí.
Confirmouse o que xa sabiamos dende hai tempo: Temas de Hoxe é a gran esperanza do audiovisual galego. Os loubáns de J.A.C. Films Corporation acaban de levar á pantalla un dos ensaios máis didáticos e rigurosos da breve historia de TDH: "A verbena: O conceto espacio-temporal". Felicitamos ao intrépido realizador Anxo Villar e esiximos o visionado da peza en universidades, posgraos, colexios, tascas e teleclubes.
A ver, moitos fans e letores pregúntannos se escribimos mal aposta a palabra "EFECTIVAMENTE". Pois a resposta é, amados letores, EFETIVAMENTE. Queremos aclarar que os redatores de TDH dominamos a normativa de todas as linguas indoeuropeas (incluso a galega que se leva este outono-inverno). Se non queda claro que escribimos a palabra EFETIVAMENTE con alevosía e por cuestións de estilo, pasaremos a usar ESATO.